Aktori Florjan Binaj ka shpallur zyrtarisht kandidaturën e tij për postin e kryetarit të Bashkisë së Tiranës.
Përmes një postimi në rrjetet sociale, ai ka deklaruar se në zgjedhjet e 9 nëntorit do të kandidojë për t’u bërë qytetari i parë i Tiranës.
I angazhuar prej vitesh në çështjet publike, Binaj vjen si një alternativë e pavarur, larg strukturave partiake, duke e konsideruar këtë një hap të nevojshëm për t’i rikthyer qytetarëve një drejtim më përfaqësues të kryeqytetit.
Bindaj e pozicionon veten si një kandidat qytetar, që synon t’i përfaqësojë të gjithë pa dallime politike apo ideologjike, duke i dhënë fund ndarjeve, të cilat sipas tij nuk i kanë shërbyer interesit publik.
“Kam vendosur të shpall kandidaturën time për Kryetar Bashkie të Tiranës duke dhënë gjithë veten time për të përfaqësuar sa më denjësisht çdo qytetare dhe qytetar, me apo pa parti, elektoratin gri por pa i ndarë njerëzit në krahë, por si të barabartë, sepse asnjë qytet dhe aq më tepër kryeqyteti, nuk mund ti shërbejë vetëm palës politike që e drejton. Unë besoj se kontributi im do i shërbejë edhe pse gjysmë mandati, shpresës dhe bashkimit, përmirësimit të jetës të të gjithë kryeqytetasve”, shkruan Flori ndër të tjera.
