Shqipëria do të përballet sot me ditën më të nxehtë të këtij sezoni, ndërsa temperaturat pritet të arrijnë deri në 40 gradë Celsius në disa zona të vendit.
Meteorologia Tanja Porja paralajmëroi se është shpallur “alarm i kuq” për temperaturat ekstreme, ndërsa kjo shënon nisjen e kulmit 3-ditor të valës së të nxehtit.
“Kaq kuq e gjithë dita. Alarmi i kuq sot. Po 40° presim sot në Shkodër. Pjesa tjetër 36, 38, 39°C. Një ditë mjaft e nxehtë. Ndërkohë sot në mesditë presim 40°, sikundër e thamë, në zona krejt të izoluara. Fillon sot kulmi treditor i valës së të nxehtit pasi kemi sot 40, nesër e pasnesër po ashtu dhe presim që nga e marta e javës tjetër të vijojë të ulet ndjeshëm temperatura në territor.“, tha Porja.
Meteorologia bëri të ditur se edhe gjatë ditës së sotme do të ketë rrebeshe të izoluara, kryesisht në zonat lindore dhe juglindore të vendit, ndërsa pjesa më e madhe e territorit do të dominohet nga moti i kthjellët dhe dielli.
“Duke iu afruar orëve të mesditës kemi një zhvillim të vranësirave në juglindje ku do të prodhohen rrebeshe afatshkurtra. Dielli do të vijojë të mbizotërojë në vijën bregdetare“, tha Porja.
