Një zhvillim i ri po “trazon” selinë blu pasi Aulon Kalaja, i ka dërguar një propozim Këshillit Kombëtar të Partisë Demokratike.
Në një dokument të gjatë drejtuar Këshillit Kombëtar të PD-së, Kalaja propozon ndryshime të thella statutore dhe ideologjike, me theks të fortë konservator, patriotik dhe kundër ndikimit të Soros në politikën shqiptare dhe brenda vetë Partisë Demokratike.
Ai kërkon ndryshimin e disa neneve të këshillit, duke patur në fokus “de-sorosizimin”, në një ndër nenet e përmendura për ndryshim citohet: “Shkëputjen e shoqërisë, ndalimin e funksionimit të organizatave, shoqatave dhe qendrave në territorin e Republikës së Shqipërisë në lidhje direkte apo indirekte me, apo nga Fondacioni Shoqëria e Hapur për Shqipërinë (Soros), ndalimin e Fondacionit Soros të kryerjes së çdo aktiviteti nga jashtë apo nga brenda që ka të bëjë me Republikën e Shqipërisë, duke e shpallur këtë fondacion si të padëshirueshëm “Non-Grata” në të gjithë territorin e Republikës së Shqipërisë, hetimin dhe sekuestrimin e aseteve të Fondacionit Soros dhe organizatave të financuara direkt apo indirekt nga apo Fondacioni Soros që prej themelimit, krijimit dhe regjistrimit të tij nga dita e parë në territorin e Republikës së Shqipërisë”.
“Gjithashtu PDSH duhet të pastrojë shtëpinë nga individët e katapultuar në strukturat qëndrore të saj prej vitesh dhe aktualisht. Nuk mund të bëhen akuza kundrejt pushtetit si i mbështetur nga Fondacioni Soros ndërkohë që brenda shtëpisë janë individë apo grupime që janë financuar në mënyrë direkte apo indirekte nga Fondacioni Soros” shkruan Kalaja, duke “thumbuar” dhe hedhur akuza ndaj Salianjit, i cili së fundmi “është rebeluar” ndaj Partisë Demokratike dhe po zhvillon takime me demokratët në qytete të ndryshme të Shqipërisë.
