Ministri i Brendshëm, Taulant Balla dhe ajo e Arsimit, Evis Kushi prezantuan paketën e re të sigurisë nëpër shkolla. Do të jetë policia vendore dhe bashkitë ata që do të përcaktojnë perimetrin e sigurisë prej 50 metrash rreth gardhit kufizues të secilës shkollë në të gjithë vendin.
Ministri Balla paralajmëroi gjithashtu edhe ndryshime ligjore sa i përket veprave penale që vënë në rrezik sigurinë e nxënësve, duke filluar nga shitja dhe shpërndarja e lëndëve narkotike, e më tej mbajtja pa leje e armëve të zjarrit dhe armëve të ftohta, si dhe çdo vepër dhune apo shfrytëzimi prostitucioni.
Brenda 90 ditësh, bashkitë do të duhet të marrim të gjitha masat për vendosjen dhe mirëmbajtjen e sinjalistikës rrugore brenda perimetrit të sigurisë. Balla paralajmëroi gjithashtu ngritjen e një Task Force të posaçme të kryesuar nga prefekti i qarkut për të siguruar marrjen e këtyre masave.
