Fare pranë qendrës së qytetit të Pogradecit, ndodhet një restorant i thjeshtë, por tepër i frekuentuar, aq sa është e vështirë të gjesh një tavolinë bosh dhe më pas të shijosh gatimet speciale dhe të rralla, të të mjeshtrit të madh të kuzhinës shqiptare, Kopi Prifti.
Kopi Prifti, u ka shërbyer mbi 20 vjet si kuzhinier, që nga Enver Hoxha, Mehmet Shehut, Beqir Ballukut, Adil Çarçanit, Abdyl Këllezit, deri tek delegacionet e larta qeveritare.
Kopi Prifti pranon të rrëfejë ekskluzivisht për ne, preferencat dhe tekat e personave ‘VIP’ të asaj kohe, që u ka shërbyer mbi 20 vjet në “Bllok” në Tiranë dhe në vilat e Pogradecit.
Pyetje: Z, Prifti, çfarë hanin udhëheqësit e lartë komunistë?
“Enver Hoxha ka patur kuzhinier personal, Stafi Laçi, (nipin e “Heroit të Popullit” Vasil Laçi), kurse unë kam qenë kuzhinier personal i Mehmet Shehut, por ne në “Bllok”, gatuanim së bashku me Stafi Laçin, sidomos kur vinim në Pogradec, së bashku me udhëheqjen e lartë. Siç dihet Enveri, vuante nga diabeti dhe ai hante çdo mëngjes dy thela pjepër dhe një copë djathë, me pak kripë, të pjekur në skarë. Mëngjesi vetëm kaq ishte, më pas pinte një kafe turke, pa sheqer.
Në drekë preferonte të parën një supë, shpesh herë me barishte dhe fileta peshku, ose mish viçi, të gatuar në furrë, me salcë të bardhë. Më pas përdorte fruta pa sheqer, si mollë të tharta ose, kumbulla, ndërsa në darkë hante vetëm një biftek të skarës dhe vetëm kos. Bukë, pothuajse nuk përdorte fare, mund të përdorte vetëm dy feta të holla, që peshonin 20 gr. Desha të theksoj se Enverit i pëlqenin jashtë mase ëmbëlsirat, por nuk hante dot, pasi ishte i sëmurë nga diabeti. Pëlqente ëmbëlsirat gjirokastrite, petë të holla, të mbushura me krem pastiçerie dhe shurup”, tregon ai.
