Sali Berisha ka shfrenuar imagjinatën duke akuzuar Edi Raën dhe deputetët socialistë se kanë përdorur ish-agjentin e FBI-së, McGonigal për të gjobitur një sërë biznesmenësh shqiptarë, duke i frikësuar ata se do të shpallen “non-grata” nga SHBA.
Berisha iu drejtua kryeministrit Rama, i cili qëndronte i ulur pranë deputetit Pandeli Majko, duke i kërkuar të mos manipulojë marrëdhëniet me SHBA, por Rama ka reaguar duke shpërthyer në të qeshura.
“Janë shumë pyetje që duhet t’i përgjigjet komisioni parlamentar, pa marrë përgjigje këto pyetje do ketë kaos, kaos, dhe vetëm kaos, dhe përgjegjësia do të bie mbi Ramën. Është e pashembullt që një kryeministër të vërë në dispozicion të tij të gjithë shtetin për të bërë luftën më monstruoze dhe të turpshme kundër pluralizmit dhe opozitës. Sa do të të mbajë imuniteti, por do të bëjmë gjithçka të ta heqim ne ty atë”, tha Berisha.
