Edi Rama, kreu i qeverisë shqiptare ka dhënë një tjetër intervistë për median italiane lidhur me marrëveshjen për ndërtimin në Shqipëri të dy qendrave për strehimin e migrantëve të shpëtuar në det nga anijet italiane.
Për prestigjiozen “Corriere della Sera”, Edi Rama tha se marrëveshja me kryeministren italiane Giorgia Meloni do të ratifikohet në parlament dhe se Shqipëria nuk është e hapur për marrëveshje të tilla me vendet e tjera.
I pyetur nëse në Shqipëri do të vijnë vetëm emigrantë burra, ai është shprehur se ky ishte interpretimi i lajmit që i bënë ata që e përçuan lajmin më mënyrë të ‘shtrembër’.
“Ata që përçuan në media në mënyrë të shtrembër atë që tha Meloni në konferencën për shtyp, folën për “burra”. Kryeministrja nënvizoi se të miturit dhe gratë shtatzëna nuk bëjnë pjesë në kategoritë e personave që do të priten në qendrën e pritjes në Shqipëri”- tha Rama.
I pyetur nese ka patur kerkesa nga vendet e tjera te BE, Rama tha se i ka refuzuar ato, por vetem qeverise italiane nuk ka mundur ti thote jo.
“Jo. Dhe ne nuk do të jemi të gatshëm për asnjë kërkesë, ashtu siç nuk ishim për kërkesa të ngjashme përpara se të na kërkonte Italia. Në Romë nuk mund të thonim jo sepse kemi një borxh mirënjohjeje që nuk do të mund ta shlyejmë kurrë, por që nuk duhet ta harrojmë kurrë”, u shpreh ai.
