Marrëveshja për aderimin e Shqipërisë në Bordin e Paqes në Gaza, themeluar nga presidenti Donald Trump, ka marrë në Kuvend edhe votat e Partisë Demokratike.
Ndryshe nga çfarë deklarohet në publik, demokratët u rreshtuan krah socialistëve. Në studion e “Opinion” në Tv Klan, Sali Berisha theksoi se dokumenti është votuar në parim dhe jo “nen për nen”, teksa tregoi dy arsyet se pse u dha kartoni jeshil.
“U votua në parim sepse unë dua ta them këtu, gjatë gjithë kohës në pushtet, porosi e prerë e përfaqësuesve të Shqipërisë në të gjitha institucionet ndërkombëtare, ka qenë do të votoni siç votojnë Shtetet e Bashkuara, për çështje sigurie. Së dyti, u detyrohemi pavarësinë e Kosovës, betejën ajrore kundër Beogradit dhe mbështetjen e fuqishme ndaj Kosovës. Ne përsëri kemi probleme me Beogradin që nuk heq dorë nga paranoja e Serbisë së Madhe. Para 3 ose 4 vitesh erdhi në Zubin Potok, Vuçiç dhe deklaroi se Serbia do të bëhet më e madhe, njësoj si Millosheviçi. Në këto rrethana, unë kam qenë, jam dhe mbetem që të votohet siç votojnë Shtetet e Bashkuara”, u shpreh Berisha.
Shqipëria e pranon këtë ftesë si një zgjedhje të vetëdijshme për të marrë përgjegjësi shtetërore në ndërtimin e paqes ne Gaza. Pas diskutimeve ne Kuvend, projektligji u miratua me 110 vota pro, 0 kundër dhe 0 abstenim.
