Policia e Shtetit ka njoftuar se janë rihapur aplikimet për 300 vende, për “Patrullë të Përgjithshme”, me qëllim plotësimin e vendeve të lira në 9 drejtori vendore të Policisë.
Në njoftim bëhet me dije se policia rihap aplikimet për plotësimin e vendeve të lira, në drejtoritë vendore të Policisë në qarqet: Tiranë, Durrës, Korçë, Fier, Vlorë, Lezhë, Shkodër, Kukës dhe Dibër. Theksohet se përzgjedhja do të bëhet përmes një procesi konkurrimi transparent, të aplikantëve më të mirë dhe më të përgatitur.
Kuotat e pranimit në Kolegjin Profesional të Formimit Policor, në Akademinë e Sigurisë, janë 300, dhe janë të ndara sipas nevojave organike të Drejtorive Vendore të Policisë. Aplikimet janë të hapura deri në datën 15.03.2023. Secili nga aplikantët duhet të dorëzojë dokumentacionin pranë Drejtorisë Vendore të Policisë, ku ai ka vendbanimin e përhershëm.
