Partia Socialiste ka bërë kallëzim penal ndaj deputetit të Partisë Demokratike, Bledjon Nallbati i cili ushtroi dhunë fizike ndaj Socialistit, Vullnet Sina.
Në kallëzimin e bërë publik, deputeti i PD akuzohet për veprën penale “Goditje ose vepra të tjera dhune që i bëhen punonjësit që kryen një detyrë shtetërore apo një shërbim publik, për shkak të veprimtarisë së tij shtetërore apo të shërbimit”.
Lajmi është konfirmua nga kreu i grupit parlamentar të PS-së, Bledi Çuçi, i cili pohon se PS nuk do të tolerojë askënd, ndërsa kjo vepër penale sipas Kodit Penal dënohet me gjobë ose deri në 3 vite burg.
“Sot, në emër të Grupit Parlamentar të Partisë Socialiste firmosa kallëzimin penal për deputetin Bledjon Nallbati për dhunën fizike të ushtruar në seancën e fundit ndaj deputetit Vullnet Sina. Qëndrimi ynë është i qartë. Nuk do te tolerojmë asnjë akt dhune dhe refuzojmë këdo që e konsideron dhunën si mundësi për të shprehur mospajtimin. Ftojmë organet ligjzbatuese të bëjnë punën e tyre dhe t’i shkojnë deri në fund ngjarjes”, shkruan Çuçi.
