Kryeministri Edi Rama është ndalur te çështja e studentëve të mjekësisë, për të cilët tha se kostoja që paguajnë për studimet sot në Shqipëri është sa 1/16 e kostos reale.
Kreu i qeverisë e cilësoi këtë si një rast “për të vënë duart në kokë”, kërkesat e mjekëve të rinj për t’u larguar drejt Gjermanisë. Rama shtoi më tej se taksapaguesit shqiptarë nuk mund të financojnë sistemin mjekësor gjerman, ndaj edhe është marrë vendimi për “bllokimin” me 5 vite të diplomave të mjekësisë.
“Kostoja e studimeve të mjekësisë në Shqipëri është 1/16 e kostos reale dhe nuk ka asnjë krahasime koston e studimeve në Gjermani. Një nga arsyet që sot në Gjermani ka një problem me mjekët, është kostoja e lartë e studimeve. Për çfarë arsye të gjithë ju, se nuk ka ndonjë student që do studime me kosto thuajse zero, të marrë diplomë për faktin se kostoja reale mbulohet nga taksat tuaja, duan të ikin në Gjermani direkt. Për kë paguan taksa populli shqiptar, për sistemin shëndetësor gjerman? Kjo është të vësh duart në kokë! Paguaje tarifën tjetër, mos i rri në kurriz taksapaguesve shqiptarë dhe ik në Gjermani. Mjeket e rinj ta kenë për nder kthimin e investimit te qytetarët e tyre”, tha Rama.
