Sali Berisha ka mbërritur në Shtetet e Bashkuara të Amerikës, duke nisur vizitën e tij në SHBA për të marrë pjesë në Konventën Republikane.
Lajmin e mbërritjes e ka bërë të ditur vetë Berisha përmes një postimi në rrjetet sociale, ku ka publikuar edhe pamje nga pritja që i është bërë nga një grup shqiptarë në SHBA. Në video, kreu i PD-së shihet duke përshëndetur dhe biseduar me simpatizantët demokratë që kishin dalë për ta takuar.
“Përtej oqeanit, një pritje shqiptare, një moment mirënjohjeje”, shkruan Berisha teksa në video shfaqet në krah të mikut të tij, Fatmir Mediut.
Gjatë qëndrimit në SHBA, Berisha pritet të marrë pjesë në disa aktivitete, ndërsa një prej eventeve kryesore të axhendës së tij është Konventa Kombëtare Republikane, e cila do të zhvillohet në Dallas më 9 dhe 10 shtator.
Në axhendë janë parashikuar gjithashtu edhe takime me komunitetin shqiptar. Takimi i parë pritet të zhvillohet të dielën, më 6 shtator, në New York, ndërsa një tjetër është planifikuar më 8 shtator në Texas.
Në qershor të këtij viti, Departamenti Amerikan i Shtetit anuloi masat kufizuese ndaj tij, rreth pesë vite pasi Berishës dhe familjes së tij iu ndalua hyrja në territorin amerikan. Më 11 qershor 2026, Departamenti i Shtetit zyrtarizoi heqjen e statusit të papërshtatshmërisë për hyrje në SHBA. Më 31 gusht, Berisha u raportua se kishte marrë vizën amerikane, ndërsa më 4 shtator u nis drejt Shteteve të Bashkuara, duke rikthyer pas disa vitesh praninë e tij në territorin amerikan.
