Nga data 15 janar deri më 15 maj 2025, në disa nga rrugët kryesore të qytetit të Durrësit do të ndalohet qarkullimi i automjeteve të transportit të përzier (ATP) në intervalet orare 07:00-09:00 dhe 16:00-18:00, nga e hëna deri të premten.
Gjithashtu, automjetet e tonazhit të rëndë me peshë mbi 6.5 ton do të jenë të detyruara të ndjekin një itinerar të caktuar nga bashkia. Ky urdhër i lëshuar nga Policia Bashkiake Durrës, ka për qëllim lehtësimin e trafikut në oraret e pikut. Sinjalistika përkatëse është vendosur në të gjitha akset kryesore hyrëse dhe dalëse të qytetit, duke paralajmëruar gjoba për shkelësit.
Ja rrugët që do të kufizohet lëvizja: rrugët “Adria”, “Stefan Kaçulini”, “Glaukia”, “Hysen Kërtusha”, “Aleksandër Goga” (nga Drejtoria e Policisë deri te Prefektura), “Dëshmorëve”, bulevardin “Epidamn”, “Egnatia”, “Taulantia”, “Currilave”, “Mars 91”, si dhe të gjitha segmentet rrugore brenda unazës së përcaktuar në hartë.












