Mjeku korçar, Dr. Nikollaq Gurllari ka ndërruar jetë në moshën 76-vjeçare për shkak të një sëmundjeje të rëndë.
Lajmi i trishtë u konfirmua vetëm mbrëmjen e sotme nga Urdhri i Mjekut i Qarkut të Korçës. Nikollaq Gurllari dha një kontribut të pashlyer në Korçë si mjek obstetër-gjinekolog.
Dr. Nikollaq Gurllari i kreu studimet në Fakultetin e Mjekësisë në Tiranë, në vitet 1965-1970. Ai u specializua për Obstetrikë-Gjinekologji pranë Spitalit Obstetrik- Gjinekologjik Tiranë 1971-1973 dhe menjëherë filloi punën si mjek obstetër-gjinekolog në Shtëpinë e Lindjes.
Ai ka dhënë mësim si mësues i jashtëm në shkollat e ulëta dhe të mesme mjekësore të qytetit të Korçës dhe që prej vitit 2002 e në vazhdim ishte pedagog i jashtëm në Departamentin e Infermierisë të Universitetit “Fan S. Noli”.
