Trajneri i Kombëtares shqiptare, Sylvinho ndodhet në zi pasi është ndarë nga jeta nëna e tij.
Federata Shqiptare e Futbollit njofton se tekniku ka udhëtuar menjëherë drejt Brazilit për të qenë pranë familjes së tij në këtë moment të vështirë.
Presidenti i FSHF-së, Armand Duka në një mesazh publik i shprehu ngushëllime trajnerit Silvinjo.
“Me hidhërim të thellë mësova lajmin e ndarjes nga jeta të nënës së trajnerit të Kombëtares sonë, Silvinjo. Në emrin tim, në emër të Federatës Shqiptare të Futbollit dhe të çdo anëtari të komunitetit të futbollit i përcjell trajnerit Silvinjo ngushëllimet më të sinqerta për këtë humbje të madhe. Në këtë moment të vështirë i gjendemi pranë Silvinjos dhe familjes së tij, që humbën një njeri shumë të dashur për ta. U prehtë në paqe!”, shkruan Duka.
