Zv.kryeministrja Belinda Balluku ka hedhur poshtë spekulimet e mediave “kazan” të opozitës të cilat pretendojnë një luftë imagjinare brenda PS mes saj dhe Erion Veliajt.
Balluku ka deklaruar se bashkë me Veliajn vijojnë të ulen në të njëjtën tryezë pune, teksa shprehet se kryebashkiaku është linçuar publikisht pas hetimeve që ka ndërmarrë SPAK.
“Unë me Erion Veliajn jemi miq të mirë dhe kemi qenë miq prej shumë kohësh, para se të kemi këto detyra. Unë e kuptoj që gjithmonë kërkohet që të ketë një telenovelë. Unë e kuptoj shumë mirë që ka një vëmendje dhe tendencë për telenovela nëpër lajme, por për të thënë të drejtën janë duke rrëmuar në vendin e gabuar se as unë, as Erioni nuk kemi ndonjë rezervë ndaj njeri tjetrit. Ndaj të njëjtin pozicion me kryeministrin. Po bëhet një linçim publik pa logjikë. Sa i përket impaktit, sot kam qenë në të njëjtën tryezë me Veliajn dhe gjithë drejtuesit e qarqeve, është në punë. Ne jemi në një fushatë që e konsiderojmë të filluar”, tha Balluku.
