Erion Braçe ka hedhur akuza ndaj Kreut të Grupit Parlamentar të PS, Taulant Balla duke thënë se ka urdhëruar bllokimin e amendamentit që mbron bujkun në raport me tregtarin. Braçe shkruan se Balla ka urdhëruar edhe votën kundër një ndihme të vogël dhe konkrete për blegtorët.
“Prej qershorit, propozimi ligjor që kam bërë është bllokuar; 5 javë më parë propozimi ishte në kalendar për t’u diskutuar në komisionet e seancës plenare; Por përsëri u bllokua në mënyrë të paligjshme jashtë çdo procedure parlamentare, nga kryetari i grupit parlamentar të Partisë Socialiste! Përse? Sepse tamam ai, ka zbuluar se unë jam kundër qeverisë së Partisë Socialiste dhe se ligji bie ndesh me politikat e saj!”, shkruan Braçe.
Më tej, Braçe ironizon Taulant Ballën, teksa thotë se qëndrimi i tij paska ardhur, pasi “ka zbuluar” se është kundër qeverisë dhe Partisë Socialiste. Sipas tij urdhri i Ballës për të votuar kundër, është një akt që reflekton padituri, ligësi dhe smirë.
