Belinda Balluku thotë se Porti i ri i Durrësit do të jetë më i madhi në Mesdhe. Balluku tha gjatë fjalës së saj në Kuvend se në fazën bazike, porti do të ketë 280 vende ankorimi për jahtet, me mundësi për t’u zgjeruar në mbi 500 vende.
Ministrja tha se lagja e re do të jetë e hapur për qytetarët dhe është projektuar të ketë një sërë hapësirash rekreative. Durrësi do të jetë qyteti me dy porte, tha Balluku, porti i jahteve më i madhi në Mesdhe dhe ai i mallrave, më i madhi në Ballkanin Perëndimor.
“Baseni i Durrësit jep mundësinë për të pasur marinën më të madhe në Mesdhe. Kjo është marina më e madhe e Mesdheut për të akomoduar numrin më të lartë të jahteve. Të nderuar, kini parasysh që baseni i Durrësit, në fazën e parë do të ketë 280 poste, por ky është skenari bazik, ashtu siç nis çdo projekt. Ky është investimi më i madh në Shqipëri, që i sjell vendit një port elitar, 12 mijë vende të reja pune, një emër të madh ndërkombëtar, vjen ai dhe më pas fillojnë dhe vijnë investime të tjera. Është një lagje e re e hapur, pa tra, aty do të hyjnë të gjithë. Ajo është komplet e hapur dhe është dizejnuar në një mënyrë të tillë që të ketë vende rekreative për qytetarët”, tha Balluku.
