Protesta e së shtunës në Tiranë pritet të jetë më e madhja deri tani.
Pas më shumë se dhjetë ditësh protestash për Sazanin, Zvërnecin, transparencën dhe kundër keqqeverisjes, kauza shqiptare ka zgjuar vëmendje të madhe ndërkombëtare.
Protesta nuk ka mbetur më vetëm në Tiranë. Shqiptarë në qytete të mëdha europiane, në Kanada dhe në Shtetet e Bashkuara janë ngritur me të njëjtin mesazh: Rama jep dorëheqjen!
Ndërkohë, edhe mediat ndërkombëtare kane zbarkuar ne Tirane dhe po e ndjekin gjithnjë e më nga afër atë që po ndodh në Shqipëri. Associated Press e ka transmetuar protestën live në Facebook, ndërsa Reuters ka raportuar nga Tirana për disa ditë me radhë.
Tashmë, sipas informacioneve që qarkullojnë, gazetarë të huaj kanë mbërritur në kryeqytet dhe media të tjera ndërkombëtare pritet t’i bashkohen nga afër protestës së së shtunës.
Ajo që nisi si kundërshtim ndaj projektit të lidhur me Jared Kushner dhe Ivanka Trump në Sazan e Zvërnec, tashmë është kthyer në një lëvizje qytetare për transparencë, llogari dhe mbrojtjen e pasurive publike të Shqipërisë. Të shtunën, Tirana pritet të jetë sërish në qendër të vëmendjes.
