Ambasada amerikane në Tiranë paralajmëron qytetarët e saj për protestën që do të mbajë Partia Demokratike e drejtuar nga Sali Berisha në ditën e Samitit të 6 dhjetorit.
Në njoftimin e selise diplomatike thuhet se protestat kanë potencialin të përhapen edhe në rrugët përreth duke shkaktuar bllokime të trafikut, devijime dhe mbyllje të rrugëve. Gjithashtu nga qytetarët amerikanë ambasada kërkon që të shmangin grumbullimet e mëdha.
“Për shkak të masave të marra në mbështetje të samitit BE-Ballkani Perëndimor në Tiranë të martën, pritet mbyllje e rrugëve dhe devijime të trafikut përgjatë gjithë ditës në qendër të kryeqytetit dhe në Unazë. Protestat kanë potencialin të përhapen dhe në rrugët përreth duke shkaktuar bllokime të trafikut, devijime dhe mbyllje shtesë të rrugëve. Qytetarët amerikanë këshillohen të shmangin grumbullimet e mëdha”, njofton SHBA.
