Prej disa orësh, mijëra emigrant shqiptarë ndodhen në Westminster të Londrës. Ata janë drejtuar për në parlamentin britanik dhe kërkojnë që qeveria të reagojë duke kërkuar falje ose në të kundërt të japë dorëheqjen Sekretarja e Punëve të Brendshme, Suella Braverman.
Kjo vjen në një kohë kur diskutimet për emigrantët shqiptarë në Britaninë e Madhe kanë qenë të nxehta. Braverman, e cila nuk ka kursyer gjuhën e ashpër ndaj atyre që hyjnë në mënyrë ilegale, është zotuar se do të gjejë një mënyrë që të funksionojë skema e Ruandës. Si kundërpërgjigje, shqiptarët zgjodhën të mblidheshin këtë të shtunë për t’i treguar sekretares britanike që ata janë bashkë, por nuk janë kriminelë.
Gjithashtu kryeministri Edi Rama i ka dalë në krah mijëra familjeve shqiptare që punojnë në mënyrë të ndershme në Britaninë e Madhe. Njësoj si Rama, edhe protestuesit i kanë kërkuar ministres britanike që të kërkojë falje për paragjykimet dhe deklaratat e saj kundër shqiptarëve.
