Pas disa raportimeve në media se mund të riktheheshin monopatinat në rrugët e vendit, Ministrja e Brendshme Albana Koçiu, ka sqaruar se kjo nuk është e vërtetë.
Sipas saj, vendimi për ndalimin e qarkullimit me monopatina mbetet në fuqi dhe nuk ka asnjë vendim për heqjen e masës së ndalimit të këtyre mjeteve.
“E PAVËRTETË! Udhëzimi për ndalimin e qarkullimit me monopatina mbetet në fuqi. Nuk ka asnjë vendim për heqjen e masës së ndalimit të përkohshëm. Policia e Shtetit vijon angazhimin e përditshëm në terren për garantimin e zbatimit të plotë të këtij udhëzimi, në përputhje me njoftimet zyrtare të bëra më herët”, thotë Koçiu.
Ministrja shprehet se bashkëpunimi i qytetarëve ka qenë i rëndësishëm dhe ka ndihmuar në uljen e numrit të aksidenteve.
“Shpreh mirënjohje për qytetarët për bashkëpunimin dhe mirëkuptimin në respektimin e kësaj mase, e cila synon mbrojtjen e sigurisë dhe jetës, në veçanti të të rinjve”, deklaron ajo.
Sipas saj, të dhënat e Policisë së Shtetit dhe të shërbimeve të traumës konfirmojnë një ulje të ndjeshme të aksidenteve që lidhen me përdorimin e monopatinave.
“Të dhënat e Policisë së Shtetit dhe të shërbimeve të traumës konfirmojnë një rënie të ndjeshme të numrit të aksidenteve gjatë periudhës së zbatimit të rregullores së re”, shpjegon Koçiu.
Pavarësisht uljes së aksidenteve, Ministria e Brendshme dhe institucionet përkatëse po vijojnë të monitorojnë situatën dhe të vlerësojnë çdo hap të ardhshëm. Sipas Koçiut, çdo vendimmarrje e mundshme do të vendoset duke pasur si prioritet sigurinë dhe jetën e qytetarëve.
“Ministria e Punëve të Brendshme, në bashkëpunim me institucionet përgjegjëse, po vijon vlerësimin e situatës për të përcaktuar vendimmarrjen më të drejtë, duke vendosur në qendër të çdo hapi sigurinë dhe jetën e çdo qytetari”, u shpreh ajo.
Ministria e Brendshme mori vendimin për të ndaluar monopatinat në rrugët e qytetit, pasi shifrat tregonin se këto mjete ishin burim aksidenti.
