Shqiptarët e Diasporës kanë edhe pak ditë kohë për t’u regjistruar si votues nga jashtë në uebsajtin e Komisionit Qendror të Zgjedhjeve. Duke u hedhur një sy të dhënave të deritanishme, rezulton se Diaspora do të prodhojë mandate të plota në 5 qarqet më të mëdha të vendit: Tiranë, Fier, Durrës, Elbasan dhe Vlorë.
Trendi aktual i regjistrimeve tregon se në Tiranë diaspora mund të ndikojë në prodhimin e dy ose tre mandateve ku deri tani janë miratuar 20 mijë votues nga jashtë. Ndërkohë në Fier, Durrës, Elbasan dhe Vlorë, deri tani Diaspora duket se do të prodhojë nga një mandat për çdo qark.
Më pak regjistrime deri tani ka në qarqet Kukës, Dibër, Gjirokastër, Lezhë dhe Shkodër. Është e kuptueshme se në qarqet e vogla ka më pak të regjistruar, por edhe aty Diaspora ka shanse të mira për të ndikuar në ndarjen e mandateve.
Bazuar në ritmin e deritanishëm, llogaritet se Diaspora do të ketë gjithsej mbi 150 mijë votues me postë, ku vetem deri tani jane 100 mije vota te aprovuara. Diaspora mund të sjellë surprizën e madhe në këto zgjedhje, sepse pritet të përcaktojë deri në 13 mandate. © Rilindje.info
