Kryeministri Edi Rama gjatë fjalës së tij në Samitin e Demokracisë të organizuar nga Presidenti i SHBA-së, Joe Biden, ka theksuar se Shqipëria ka dëshmuar jo vetëm angazhim kombëtar për të ndërtuar një shtet që mbështet institucionet demokratike, por gjithashtu ka ecur me kembëngulje drejt këtij destinacioni.
Ai tha se një nga përparësitë e qeverisë së tij është përmirësimi i jetës demokratike si dhe shërbimi i qytetarëve. Ndër të tjera, Rama nuk la pa përmendur as reformën në drejtësi për të cilën u shpreh se ajo deri para disa vitesh ishte e paimagjinueshme ndërsa tani është e prekshme dhe po ndëshkon të gjithë individet e lidhur me pushtetin.
“Reforma jonë në drejtësi, që është në themel të agjendës sonë të reformave transformuese, po i tregon më në fund vendit se, po, të luftosh korrupsionin është jo vetëm e mundshme, por e bëshme. Ndaj, falë një reforme të tillë tërësore dhe institucioneve krejt të reja të drejtësisë, ajo çfarë ishte historikisht e paimagjinueshme deri pak vite më parë, po bëhet praktikisht e mundur: individët e lidhur me pushtetin dënohen dhe ndiqen penalisht. Kjo nuk kishte ndodhur kurrë më parë në historinë e Shqipërisë”, tha Rama.
