Shqipëria do të luajë sot ndeshjen më të rëndësishme në histori, ku një sukses ndaj Spanjës do të na çonte për herë të parë në fazën e 1/8-ave të Kampionatit Europian.
Spanja e ka siguruar vendin e parë në grup dhe ndaj skuadrës së Sylvinhos do të zbresë në fushë me formacionin e dytë, i cili gjithashtu është i mbushur me “yje” që luajnë në ekipe të mëdha.
Por një statistikë e pabesueshme e Spanjës nuk e bën optimiste Shqipërinë. Bëjmë me dije që nga Botërori i Katarit (dimrin e vitit 2022), Spanja ka humbur vetëm dy herë, ndaj Skocisë më 23 mars 2023 me rezultatin 2-0 dhe në ndeshjen miqësore ndaj Kolumbisë më 22 mars 2024 me rezultatin 1-0.
Pra, Spanja në një vit e gjysmë ka humbur vetëm 2 herë. E veçanta e këtyre dy ndeshjeve është se trajneri De la Fuente ka luajtur me formacionin e dytë, ashtu siç do bëjë ditën e hënë ndaj Shqipërisë.
