Në një moment kur konflikti në Lindjen e Mesme po përshkallëzohet, kryeministri Edi Rama ka zhvilluar një komunikim me ambasadorët shqiptarë në vendet e prekura.
Qëllimi ishte të garantohen masat e sigurisë për shtetasit shqiptarë dhe të sigurohet një koordinim i vazhdueshëm për menaxhimin e nevojave dhe kërkesave të tyre. Gjatë këtij “takimi” virtual, u diskutua rëndësia e mbajtjes së kontakteve të ngushta me bashkëatdhetarët në zonat e konfliktit dhe sigurimi që ata të kenë mundësi të lidhen me ambasadat në çdo moment.
Ambasadori Ferit Hoxha, i cili pas dekretimit nga presidenti Bajram Begaj, pritet të marrë detyrën si Ministër i Jashtëm, theksoi gatishmërinë e diplomacisë shqiptare për të ofruar mbështetje për qytetarët.
“E mira është që të mbajmë kontakte, ti kemi të gjithë të regjistruar, të kenë mundësi që të kenë konflikt në çdo orë me ambasadën se ne jemi ata që do të mund ti ndihmojmë ata. Ne jemi në krye të detyrës”, tha Hoxha, ndërkohë që kryeministri Rama vuri në dukje rëndësinë e koordinimit të ekipit diplomatik.
“Për çdo gjë me këtë ekip që keni të koordinuar besoj që do jemi të informuar në kohë reale”, tha Rama.
