Politikania e majtë Monika Kryemadhi ka publikuar në llogarinë e saj një sqarim për përballjen e fundit në seancën gjyqësore, mes saj dhe prokurorit Altin Dumani, për të dhënat në dosjen hetimore ku ajo akuzohet bashkë me nënën, ish-bashkëpunëtorin dhe të tjerët.
“Zarf i zi për SPAK-un e Altin Dumanit. Pretendoni se keni ndërtuar një dosje prej 240 faqesh mbi bisedat e telefonit të Monika Kryemadhit”, shkruan ish-deputetja, ndërsa shton disa pyetje, të cilat i sqaron edhe gjatë videos që ka publikuar:
1- Me vendimin nr. 481, datë 17.12.2023, gjykata vendosi se telefoni nuk është i Monika Kryemadhit.
2- Atëherë, mbi çfarë provash mbështetet akuza?
3- Nëse, përkundrazi, pretendoni se telefoni është i saj, atëherë ku është autorizimi i kërkuar sipas nenit 73 të Kushtetutës dhe nenit 288 të Kodit të Procedurës Penale?
4- Me çfarë vendimi gjykate është hapur telefoni im?
Monika Kryemadhi thotë se këto pyetje kërkojnë përgjigje shumë të qarta nga Prokuroria e Posaçme. Duke sqaruar sekuestrimin e celularit, ajo thotë se nga ekspertimi i komunikimeve, nuk ka rezultuar asnjë mesazh me kushëririn Adrian Shatku apo ish-bashkëshortin Ilir Meta.
Gjithashtu, Kryemadhi pyet se përse Prokuroria e Posaçme nuk ka kërkuar të marrë lejen e Kuvendit të Shqipërisë, kur vendosi të sekuestronte dhe zbërthente celularin e saj, sepse në vitin 2023 ajo ka qenë deputete dhe ka pasur imunitet.
Sipas saj, aty ka më shumë mesazhe mes saj dhe kryeministrit Edi Rama, ndaj SPAK duhet të zëvendësojë Ilir Metën dhe në vend të tij, të marrë të pandehur kryeministrin.
