Paraditen e së premtes (5 korrik) do të hapet Tuneli i Llogarasë, një vepër e rëndësishme infrastrukturore.
Turizmi është përfituesi më i madh i këtij kalimi, që i jep një dimension tjetër rivierës shqiptare. Nëse me një ecje normale nga Dukati në Dhërmi do të duhen rreth 40 minuta udhëtim apo ndoshta edhe më shumë, nëpërmjet tunelit, koha maksimale për të shkelur në bregdetin kristalor të Dhërmiut është 10 apo 12 minuta.
Kreu i ARRSH, Gentian Gjyli shpjegon disa nga detajet më interesante të këtij investimi me vlerë 180 milionë euro.
“Sot që flasim është vepra më e rëndësishme e infrastrukturës shqiptare. Sot jemi dy muaj para afatit. Kontraktori bëri çmos, që ta bënte të kalueshëm brenda këtij sezoni veror. Tani kemi vetëm detajet e fundit, pastrimet, tabelat, vijëzimet dhe më datë 5 korrik do të jetë i kalueshëm me siguri të plotë për qarkulluesit e rrugës. Në kushte normale ky tunel shkurton rreth 30 min, në kushte trafiku deri në 45 minuta apo 1 orë”, tha Gjyli.
