Një debat i rrallë brenda Partisë Demokratike ka detyruar ndërprerjen e përkohshme të mbledhjes së Këshillit Kombëtar, ndërsa për disa çaste është ndërprerë edhe transmetimi live nga selia blu.
Shkak për përplasjen u bë një pretendim i anëtares së Këshillit Kombëtar, Ilirjana Kuçana, e cila kërkoi të diskutohej një rezolutë që, sipas saj, ishte dorëzuar 24 orë përpara mbledhjes, në përputhje me parashikimet e statutit të Partisë Demokratike.
Kryetarja e Këshillit Kombëtar, Julia Emiri, iu përgjigj Kuçanës se mbledhja kishte një rend dite të miratuar dhe se rezoluta e paraqitur prej saj nuk mund të përfshihej për diskutim në atë seancë.
Në debat ndërhyri edhe kryetari i Partisë Demokratike, Sali Berisha, i cili i kujtoi Kuçanës dispozitat e statutit, duke argumentuar se kërkesa e saj nuk lejohej sipas rregullave të partisë.
Përplasja mes të dyve vijoi për disa momente. Në një çast, Berisha iu drejtua Kuçanës me fjalët: “Nuk mund ta shkruajmë statutin këtu.”
Kuçana vazhdoi të kundërshtonte argumentet e Berishës, por në atë moment nuk kishte mikrofon, ndaj reagimi i saj nuk u dëgjua në transmetim.
Vetëm pak sekonda më vonë, regjia e selisë së Partisë Demokratike ndërpreu sinjalin e transmetimit live nga mbledhja, ndërsa seanca u pezullua përkohësisht.
