Pas mbledhjes prej disa orësh me grupin e Partisë Socialiste, kryeministri Edi Rama foli gjatë për procesin e negociatave të Shqipërisë me Bashkimin Europian, që sipas tij ka hyrë në fazën vendimtare.
“Dy vitet e ardhshme janë kritike për Shqipërinë. Duhet që të mbyllim brenda 2027-ës negociatat e anëtarësimit në Bashkimin Europian. Kështu e kemi nga plani që kemi në tryezë”, deklaroi Rama për atë që e konsideron prioritet të këtij mandati qeverisës.
Edhe pse e theksoi që vendi ynë ka bërë progres, ka një sektor që sipas tij mbetet ende sfidues përballë europianëve.
“Edhe në Shqipëri ushqimet mund të bllokohen sepse nuk përmbushin kriteret e sigurisë dhe në skenarin më pesimist, do të thotë që gjithçka që hahet të importohet, po shkoj në ekstrem“, tha kreu i qeverisë.
