Ndryshime të tjera kërkohen në Kodin Rrugor, por që këtë herë ofrojnë lehtësim për drejtuesit e autoveturave. Disa amendime të iniciuara nga një grup deputetësh kanë nisur diskutimin në parlament.
Ndryshimet parashikojnë përgjysmimin e gjobave maksimale, heqjen e postblloqeve abuzive të policisë në rrugë, heqjen e detyrimit për rinovimin e patentës deri në moshën 55 vjeç dhe rritjen e shpejtësisë së lëvizjes në rrugët e klasifikuara si autostradë nga 110 km/h në120 km/h.
Ndërsa propozohet ulja me 50% e gjobave maksimale, kreu i shoqatës së transportit ndërqytetas, Kujtim Mema, sugjeron se për shkelje të vogla duhen zbutur edhe dënimet e tjera, si heqja e patentës për 6 muaj. Ndërsa qytetarët ndeshen çdo ditë me këtë problem, propozohet si zgjidhje shtimi i parkimeve në rrugë pa pagesë, të garantuar për çdo rezident.
