Fredi Beleri nuk është i burgosur i vetëm, i cili nga qelia arriti të zgjidhej Euro-deputetet në Parlamentin Europian. Rasti tjetër është shënuar në Itali, ku Ilaria Salis, mori 165 mijë vota nën siglën e Aleancës së Gjelbër.
Salis është një mësuese nga Monza, e cila njihet si anti-fashiste, me bindje të majta dhe që prej 15 muajsh ndodhet e burgosur në Hungari. Lajmi u bë publik nga lideri i të majtës italiane Nicola Fratoianni i cili deklaroi se “duke filluar nga sot Salis është një Euro-deputete”.
Pas qëndrimit për rreth 14 muaj në paraburgim, Ilaria Salis tashmë po mbahet nën masën e sigurisë “Arrest në shtëpi” në Budapest. Salis u arrestua më 11 shkurt 2023 së bashku me dy aktivistë gjermanë me akuzën e pjesëmarrjes në rrahjen e tre militantëve të ekstremit të djathtë, duke u akuzuar për pjesëmarrje në grup kriminal.
