Ish-Sekretari i Përgjithshëm i PS-së, Damian Gjiknuri teksa i dorëzonte detyrën Blendi Klosit, u pyet nga gazetarët nëse ndihej i ‘shitur’ nga ana e kryeministrit Edi Rama.
Gjiknuri u shpreh se shkarkimi i tij nuk ka të bëjë me inceneratorët, por me përgatitjen e PS-së për t’u organizuar për zgjedhjet e ardhshme të vitit 2025.
A ndiheni i ‘shitur’ nga Edi Rama? “Së pari unë e kuptoj që befasia e këtij lajmi ka bërë bujë në rrjetet sociale. Unë e thashë që ne pas çdo zgjedhje bëjmë analiza dhe rezultate, dhe ky ndryshim është rrjedhojë i kësaj analize, nuk e quaj fare në atë term që ju e thoni. Jeta më ka mësuar që të jem përballë të papriturave. Unë jam mësuar me akuza, fatkeqësisht edhe për shkak të personalitetit tim deri diku të fortë, dhe për pozicionet e rëndësishme që unë kam pasur. Unë jam në komunikim të vazhdueshëm me kryetarin e partisë, në distancë aq sa e lejon detyra e secilit, unë i vlerësoj mundësitë që më ka dhënë. Nuk jam thirrur ndonjëherë nga SPAK për inceneratorët, roli i Ministrit të Energjisë ka qenë periferik, nëse më thërrasin do të jap shpjegime”, tha Gjiknuri.
