Janë duke ecur me rritëm të lartë punimet në aksin Kombinat-Ndroq-Plepa, ku janë realizuar afro 25% e punimeve fizike.
Punimet janë fokusuar nga dalja e Urës së Beshirit, ku ka përfunduar procesi i gërmimeve në trupin e rrugës, si dhe është bërë e mundur spostimi i linjave elektrike dhe atyre të ujësjellësit, si dhe sistemimi i ujërave të zeza.
Zv/kryeministrja Balluku e cilësoi projektin për rehabilitimin e këtij aksi, si një ndër më të rëndësishmit, i cili jo vetëm do të lehtësojë lëvizjen, por do të ketë një impakt të drejtpërdrejt në zhvillimin e të gjithë zonës.
“Në këtë segment do të kemi edhe një sërë risish, duke pasur një zgjerim të kurorës së rrugës e cila shkon deri në 12.5 metra, rritje të shpejtësisë dhe nga ana tjetër do të kemi dhe ndërtimin e një ure e cila është pjesë e projektit të Bankës Botërore që quhet projekti i urave. Zona e Ndroqit deri në Plepa është i aksesueshëm shumë lehtë nga Tirana, siç është dhe nga Durrësi, kjo e bën projektin një nga projektet më të rëndësishme dhe kantieret më të rëndësishme që ne kemi në këto momente. Zona e Pezës, Ndroqit dhe deri në Plepa do të marrë një zhvillim tjetër turistik, atë të agroturizmit”, tha Balluku.
