Zëvendëskryeministrja, njëherësh Ministër i Infrastrukturës dhe Energjisë, Belinda Balluku , ka prezantuar shpalljen e fituesit të ankandit ndërkombëtar për ndërtimin e parqeve eolike.
Balluku u shpreh se kjo garë është lancuar 2 vite më parë, por si çdo projekt i mirërealizuar mori kohën e vetë.
Balluku theksoi se Shqipëria do të prodhojë energji elektrike edhe nga era, edhe për këtë ministria u ka ardhur në ndihmë këtij projekti me një studim analitik, i cili përmbante vendet e përshtatshme për ndërtimin e parqeve eolike.
“Kemi nisur punën në 15 Qershor të 2021-shit, 25 muaj më parë. Kur i kam shpjeguar kryeministrit që ishim gati për të hapur garën për parkun eolik, u gëzua pa masë, por kur i thashë se sa muaj do të merrte, filluan debate mes palëve. Në parqet voltaike, shteti shqiptar ka vënë në dispozicion tokën. Këtë radhë kemi instrument të ri, investitori, duhet të merrte parasysh dhe gjetjen e tokës. Kemi porositur një studim analitik që tregonte se si duhet të ndërtohen në territorin e Shqipërisë parqet eolike. Pas një konsultimi, kemi vendosur që nëse këto oferta do të sillnin më shumë se 150 megavat orë të vlefshëm, ne do të ishim të hapur për 200, 250 ose më tepër“, tha Balluku.
