Ministria e Bujqësisë ka reaguar pas lajmit të qarkulluar ditën e sotme ku media pranë Saliut raportuan se: “Komisioni Europian ka pezulluar grantet për bujqësinë nga programi IPARD, për shkak të korrupsionit dhe mos respektimit të procedurave nga AZHBR”.
Përmes një reagimi zyrtar lidhur me këto akuza, Ministria e Bujqësisë thekson se puna dhe projektet po vazhdojnë.
Autoritetet shqiptare janë vënë në dijeni të një pezullimi të faturës aktuale të të rimbursimit nga DG AGRI për një pjesë të shpenzimeve te radhës, mirëpo ky është një proces krejtësisht administrativ që lejon riverifikimin e sistemeve të kontrollit nga strukturat e akredituara të cilat do të marrin masat e nevojshme me qëllim vijimin normal të rimbursimit nga BE.
“Keto janë procedura normale të Bashkimit Europian në kushtet kur ka nevojë të verifikohen shpenzime të dyshuara për aktivitet jo konform rregullave të përcaktuara”, thuhet në njoftimin e Ministrisë.
Ndër të tjera në deklaratë theksohet se: “Të gjitha strukturat shqiptare janë në bashkëpunim me zyrën e OLAF dhe DG AGRI duke ofruar transparencë të plotë të të gjithë proceseve kontrolluese, hetuese dhe administrative të ndjekura deri më sot apo që mund të aktivizohen në të ardhmen.”
