Drejtoresha e re e QSUT-së, Anxhela Paparizo është zgjedhur me “konsensus” nga dy kampet rivale politike, ku PS dhe PD si rrallë herë janë bërë bashkë për një “post” të rëndësishëm në shëndetësi.
Por pak kush e di që drejtoresha e re e QSUT-së, Anxhela Paparizo e ka mbajtur mirë me dy kampet rivale të politikës, pasi në heshtje Sali Berisha ka “bekuar” emërimin e saj në krye të QSUT-së, kjo për shkak të marrëdhënieve të mira që Paparizo ka pasur me liderin demokrat.
Vetëm pak kohë më parë, Paparizo pozonte në krah të Sali Berishës në selinë blu, e cila kishte rolin e nënkryetares së Këshillit Koordinues të Diasporës. Berisha e përshkroi atë takim si një diskutim mbi sfidat e vendit dhe rolin e diasporës, duke ritheksuar angazhimin e PD-së për të drejtën e votës së emigrantëve.
Gjithashtu Anxhela Paparizo ka marrëdhënie të mirë dhe lidhje të hershme edh me kryeministrin socialist, pasi ajo mbante postin e drejtoreshës së Kulturës në bashkinë e Tiranës që asokohe drejtohej nga Edi Rama.
Vlen të përmendim që edhe emërimi i Evis Salës në krye të shëndetësisë nuk ka gjetur kundërshti nga kampi blu që mesa duket në heshtje shpreh pëlqimin për propozimin e Edi Ramës.
Ndoshta për herë të parë kampi blu dhe rozë janë në “një mendje”, kur bëhet fjalë për ministren e re të Shëndetësisë Evis Salën por edhe drejtoreshën e QSUT-së, Anxhela Paparizo.
Anxhela Paparizo rikthehet në Shqipëri pas 17 vitesh qëndrimi në diasporë, duke sjellë me vete mbi 20 vite eksperiencë dhe kontribut në administratën publike, si në Shqipëri, ashtu edhe në Kanada, në role drejtuese dhe menaxhuese.
