Kryeministri Edi Rama ditën e fundit të vitit ka anuluar konferencën e shtypit, pasi ka lënë që të flasë “Pakoja e Madhe” e qeverisë. Mbi 8 miliardë lekë që do të jepen si shpërblim me para në dorë për 1 milionë shqiptarët, duke nisur nga ditët e para të janarit.
“Sot nuk e pashë të udhës të bëj një konferencë shtypi si çdo fundvit, po lashë Pakon e Madhe kundër inflacionit të luftës të flasë për pensionistët, familjet me ndihmë ekonomike, personat me aftësi të kufizuara, invalidët e punës”, shkruan Rama, duke e konsideruar ndihmën e qeverisë ndaj qytetarëve si të jashtëzakonshme dhe të padëgjuar më parë.
Ai thotë se si kurrë më parë, kategoritë e mësipërme do të marrin një mbështetje financiare ekstra, sepse si kurrë më parë, u duhet të përballen me një dimër të vështirë.
“Ne nuk mund t’i linim ata vetëm në këtë dimër të vështirë për të gjithë Europën, po mbi të gjitha për më të dobëtit. Prandaj duke u nisur në radhë të parë, pikërisht nga nevoja për ta larguar atë dorë shqetësuese nga konsumi i tyre bazë, ideuam Pakon e Madhe”, vijon kryeministri, duke u zotuar se shqiptarët nuk do të jenë kurrë vetëm.
