Qeveria Rama ka vendosur t’ua bëjë më të lehë marrjen e shtetësisë shqiptare të huajve, në rastet kur kontributi i tyre përbën interes kombëtar.
Përmes një vendimi të publikuar në Fletoren Zyrtare dhe të hyrë tashmë në fuqi, është vendosur që pasaportën shqiptare mund ta marrin me procedurë të përshpejtuar jo vetëm të huajt me kontribut të veçantë në fushat e arsimit, shkencës, artit, kulturës dhe sportit.
“Në rastet kur Republika e Shqipërisë ka interes kombëtar, institucioni i Presidentit ose Kryeministria apo ente të autorizuara prej tyre paraqesin kërkesën për fitim shtetësie, sipas programeve të veçanta të shtetësisë pranë Ministrisë së Brendshme, e cila duhet të përmbajë gjeneralitetet e individit”.
Ndërkohë që dhënia e pasaportës shqiptare të huajve me interes për vendin në fusha si arsimi, sporti, shkenca, arti dhe kultura nuk ka kriter provimin e gjuhës shqipe. Një ndër detyrimet e lehtësuara është qëndrimi për vetëm 3 muaj gjatë 5 vjetëve nga miratimi i kërkesës.
