Kryeministri i Shqipërisë, Edi Rama dënon vendimin e Serbisë për shpalljen “ditë zie” pas vrasjeve të agresoreve serb nga policia e Kosovës.
Rama thotë se ky është një sinjal i dënueshëm dhe i papranueshëm nga ana e Serbisë. Sipas Ramës, Beogradi me këtë shpallje zije po i fryn zjarrit për një konflikt të armatosur.
“Zija e shpallur zyrtarisht në Beograd për pjesëtarët e grupit të armatosur që u asgjësuan nga forcat e sigurisë së Kosovës, pasi nga ai grup iu mor jeta një efektivi të policisë është sinjali më i keq që Serbia mund t’i jepte rajonit dhe komunitetit euro-atlantik! Serbia duhet të kishte hapur një hetim serioz për anëtarët e atij grupi kriminal, lidhjet e tyre me trafikantët e armëve per trazirat ne Veriun e Kosovës.
Beogradi me këtë shpallje zije që nuk ka asnjë lidhje me shekullin XXI, i fryn si asnjëherë më parë qysh prej vitit 1999, zjarrit të një konflikti të armatosur! Ky është momenti që Serbia duhet ta ndajë qartë mendjen nëse do të jetë me Europën dhe botën demokratike të shekullit 21 apo me hijen e vetvetes së fundshekullit 20“, shkruan ndër të tjera Edi Rama.
