Këshilli Administrativ e Institutit të Sigurimeve Shoqërore miratoi vendimin për indeksimin e të gjitha kategorive të pensioneve publike në masën 8.6%.
Kjo masë përcaktohet nga Indeksi i Çmimeve të Konsumit të shportës së mallrave dhe shërbimeve për pensionistët, që sipas INSTAT rezulton të jetë rritur me 8.6 për qind këtë vit.
Pas miratimit në Këshillin Administrativ të Sigurimeve Shoqërore, vendimi do të kalojë për miratim në qeveri dhe rritja parashikohet të hyjë në fuqi muajin e ardhshëm. Sipas llogarive të qeverisë, nga data 1 tetor 2023, mbi 767 mijë përfitues të të gjitha kategorive të pensioneve do t’u rritet pensioni.
Pensioni mesatar, i cili llogaritet si fondi total i shpenzimeve për pensione pjesëtuar për numrin e pensionistëve, do të shkojë në 187.940 lekë të vjetra në muaj nga 170,306 lekë që është aktualisht. Kjo do të thotë se mesatarisht pensionet do të rriten me rreth 15.000 lekë të vjetra në muaj.
