Kreu i PD, Sali Berisha, zhvilloi këtë të shtunë një komunikim online me qytetarët, ku iu përgjigj pyetjeve mbi situatën brenda partisë.
Gjatë bashkëbisedimit, Berisha u pyet për mungesën e garës në PD, duke qenë se ai është i vetmi kandidat i regjistruar për drejtimin e saj.
Në përgjigjen e tij, Berisha nuk përmendi emra konkretë por la të nënkuptohet se e kishte për Ervin Salianjin, ku theksoi se nuk mund të garojnë ata që kanë tradhtuar partinë apo kanë bashkëpunuar me kundërshtarët politikë, nuk mund të jenë pjesë e garës.
Berisha u shpreh se PD zhvilloi një proces demokratik dhe të ndershëm për zgjedhjen e drejtuesve, duke theksuar çdo anëtar që plotëson kriteret është i mirëpritur të kandidojë.
“PD ka garën më demokratike dhe të ndershme. Kryetarët e partive në familjet tona si motra, vetëm një pjesë e vogël zgjidhen nga anëtarësia, të tjerët i zgjedh Kryesia. Të siguroj se kjo parti pranon dhe do pranojë çdo demokrat që plotëson kriteret për të marrë pjesë në këtë garë. Besoj se kjo është gara më e rëndësishme e partisë dhe duhet të përfaqësojë anëtarësinë e partisë.
Në garë të marrin pjesë kandidatë të Ramës? Apo kandidatë që në fushatë elektorale punuan haptas kundër PD? Apo kandidatë që në fushatë kaluan në parti tjetër? Këta në çdo parti politike në botë, këta përjashtohen për tradhtinë që kanë bërë ndaj partisë së tyre në moment beteje. Është jashtë çdo logjike që këta të mund të imagjinohet se do mund të kandidojnë, jo. Për të kandiduar për kryetar partie duhet të plotësosh në bazë të kritereve”, tha Berisha.
