Në përfundim të sezonit veror turistik, Autoriteti Rrugor Shqiptar do të nisë punimet për zgjerimin e autostradës Tiranë-Durrës.
Drejtori i Përgjithshëm i ARRSH, Gentian Gjyli së bashku me inxhinierë, përfaqësues të bashkisë Tiranë, të Policisë Rrugore përfaqësues të kontraktorëve dhe të supervizorëve të kontratës “Zgjerimi i autostradës Tiranë-Durrës”, zhvilluan një takim ku diskutuan nga afër planin e devijimit dhe të trafikut.
“Tashmë pas rënies së fluksit turistik në vend, do të merren të gjitha masat që të fillojnë menjëherë punimet për zgjerimin e këtij aksi të rëndësishëm”, bën të ditur ARRSH.
Zgjerimi i autostradës Tiranë-Durrës me nga dy korsi në secilën anë, ku njëra do të shërbejë për emergjencat do t’i kushtojë buxhetit të shtetit 298.8 milionë euro. Puna për zgjerimin e autostradës nis me përfundimin e sezonit veror në 2 lotet e para kthesa Kamzës-Vorë dhe Vorë-Sukth, për të cilët janë shpallur edhe fituesit.
