Mes tensioneve ka nisur seanca plenare e kësaj të enjte në Kuvendin e Shqipërisë. Ka qenë fjala e Sali Berishës në foltore ajo e cila ka bërë që kryetari i Kuvendit, Niko Peleshi t’i fikë mikrofonin pas fjalorit banal.
Berisha përdori fjalë aspak adekuate teksa ishte duke folur për çështjen e zv.kryeministres Belinda Balluku.
“Parlamenti është strofulla e mbrojtjes së hajdutëve. Këta që janë pas shpinës sime, edhe këta të këtij krahu, janë të gjithë maska e Lubisë dhe Edi Ramës. Këta janë maska. Kurrë ndonjëherë të dashur qytetarë nuk keni pasur në këtë sallë një grup njerëzish, të cilët shkelmojnë mbi interesat tuaja jetike për të mbrojtur, më falni, në pamje të parë vithet e Belindës, në të vërtetë Edi Ramën“, tha Berisha.
Ndërkohë që menjëherë pasi Peleshi bllokoi fjalën e Berishës, deputetët e tij u bënë “zinxhir” në foltoren e Kuvendit duke i kërkuar kryetarit që t’i japë fjalën kreut të Partisë Demokratike.
“Uluni nëpër vende, nuk mund të lejojmë këtë lloj fjalori në Parlament deri sa të jem unë kryetar Kuvendi. Zini vendet, ndërpritet fjala”, ia ktheu Peleshi.
Ndërkohë që Berisha vijoi të mos sprapset duke vijuar të kërkojë fjalën e tij. Por, Peleshi i vendosur vijoi me vazhdimësinë e seancës duke ia kaluar fjalën deputetëve të tjerë të opozitës, të cilët për shkak “ndëshkimit” të Berishës vendosën që ta bojkotojnë radhën e tyre.
“Nuk kam si të marr unë fjalën kur ju i prisni fjalën kryetarit të opozitës, ju duhet ta respektoni“, tha Bujar Leskaj.
