Mediat greke kanë analizuar me detaje darkën e shtruar mbrëmjen e djeshme nga kryeministri i Greqise Kyriakos Mitsotakis, për liderët e Ballkanit si dhe krerët e BE-së.
Në këtë tavolinë mungoi kryeministri i Shqipërisë Edi Rama, pasi homologu i tij grek nuk e ftoi për shkak të konfliktit shqiptaro-grek për çështjen “Beleri”, i cili ra në prangat e autoriteteve shqiptare nën akuzat për blerje votash.
Për mediet greke Mitsotakis përmes kësaj darke ka dashur të japë mesazhe të rëndësishme, ku një prej tyre e ka pasur për kryeministrin Edi Rama.
“Qëllimi i arritur është mesazhi i rëndësishëm i mos-ftesës së kryeministrit shqiptar Edi Rama në darkë. Mesazhi nuk i drejtohej vetëm Tiranës, por shkoi në të gjitha drejtimet dhe thoshte se Greqia nuk do të tolerojë asnjë lëvizje që ose cenon interesat e saj ose nuk është në përputhje me standardet europiane. Qëndrimi i Athinës ka qenë prej kohësh i qartë dhe thotë se qeveria shqiptare ka tejkaluar kufirin me çështjen Beleris”, thuhet në shkrimin e gazetës greke.
