“Banka Credins” ka sqaruar se ka rënë pre e një sulmi kibernetik, por të gjitha llogaritë dhe asetet e qytetarëve janë të sigurta dhe të paprekura. Banka sqaron se si pasojë e sulmit është prekur një sistem periferik, por gjithçka është izoluar.
“Me qëllim evitimin e shqetësimeve të klientëve tanë, njoftojmë të gjithë klientët e ‘Bankës Credins’ që kemi qenë pre e një sulmi kibernetik, ku për pasojë një sistem periferik është prekur e më tej është izoluar duke siguruar që janë zbatuar masat më të larta të sigurisë informatike.
Stafet tona të teknologjisë në bashkëpunim me partnerët tanë ndërkombëtarë, kanë ndërmarrë të gjitha hapat e nevojshëm ligjorë, duke njoftuar të gjitha organet rregullatore e mbikqyrëse të cilat janë duke ofruar mbështetjen maksimale. Banka Credins i siguron të gjithë klientët, se të gjitha llogaritë dhe asetet e klientëve te saj, janë të sigurta dhe të paprekura nga ky sulm”- njofton Banka Credins.
