Një turiste angleze dhe vajza e saj janë mrekulluar nga ndershmëria dhe mirësia e stafit të Hotel Saranda Palace, pas një gabimi që kanë bërë me pagesën, dhe historinë e veçantë Tara Young e ka ndarë në rrjetet sociale, duke ftuar turistët që të zgjedhin qytetin e bregut të Jonit për pushime.
“Po qëndrojmë në Hotel Saranda Palace në Sarandë dhe, pasi blemë disa pije nga bari i hotelit, fatura doli 1,000 lekë. Duke qenë se nuk e njihja monedhën, aksidentalisht i dhashë një kartëmonedhë 10,000 lekëshe, duke menduar se ishte 1,000”, tregon turistja.
Ajo tregon se mbrëmjen e kaluar (8 Korrik), pak momente pasi ishte larguar nga bari dhe ishte ngjitur në dhomë, stafi i hotelit e ka telefonuar dhe e ka njoftuar se dikush po e priste në ambientet e barit.
“Pak kohë më vonë, telefoni në dhomën tonë ra. Recepsioni më kërkoi të zbrisja poshtë sepse dikush po më priste. Kur arrita atje, një nga kamerierët po qëndronte atje me paratë në dorë. Ai më tha se aksidentalisht kisha paguar shumë dhe më ktheu diferencën pa hezitim. U mahnita vërtet.
Në një botë ku dëgjojmë kaq shpesh për gjërat negative, kjo përvojë meriton të festohet. Ndershmëria, integriteti dhe respekti i treguar nga stafi i Hotel Saranda Palace kishin shumë rëndësi për mua dhe është diçka që nuk do ta harroj kurrë”, shkruan Tara Young.
Turistja angleze e cilëson këtë moment si një episod të mrekullueshëm që tregon se ndershmëria dhe mirësia janë të gjalla dhe të shëndetshme në Shqipëri.
“Faleminderit kamerierit që vuri re gabimin tim dhe të gjithë ekipit që u sigurua që të merrja paratë mbrapsht. Jeni një nder për hotelin tuaj, për banorët e Sarandës dhe për Shqipërinë në tërësi.
Nëse po vizitoni Shqipërinë dhe kërkoni një vend për të qëndruar, mund të them sinqerisht se këtu na kanë trajtuar me ngrohtësi të vërtetë dhe ndershmëri të jashtëzakonshme. Përvoja të tilla janë pikërisht arsyeja pse njerëzit bien në dashuri me këtë vend të bukur. Faleminderit, Shqipëri”, shkruan ajo.
