Kryeministri Edi Rama ka konfirmuar qëndrimin e Qeverisë Shqiptare se nuk mund të përkrahë deklaratën e Bashkimit Europian lidhur me dialogun Serbi-Kosovë, pas ngjarjes së fundit, kur nga një grup kriminal u vra një efektiv i policisë së Kosovës.
Rama i ka dalë në krah Kosovës kur tha se nuk mund të linjëzohemi me BE-në pa një qëndrim të dytë të saj, në pëputhje me realitetin e ri të krijuar.
“Qëndrimi ynë për herë të parë êshtë në kundërshtim me një deklaratë të politikës së jashtë të BE-së. Ky qëndrim lidhet me faktin se deklarata e BE-së, është një deklaratë e cila jo se në vetvete ka problem, pasi adreson gjithçka që është thënë më parë nga Borrell, në lidhje me detyrimet e Kosovës. Por nuk i përgjigjet realitetit të ditëve të fundit. Nuk mund të linjëzohemi me BE-në, pa parë një deklaratë të dytë që adreson problematikën e ditëve të fundit. Ku ka ndodhur një zhvillim dramatik. Është vrarë një efektiv i policisë së Kosovës nga një grup kriminal që ka qenë i investuar. Kjo për ne është e papranueshme. E dënueshme. Jo-europiane dhe sepse është sinjali më i keq që mund të jepte Serbia në këtë moment. BE-ja të vërë alarmin në nivelin më të lartë”, tha Rama.
