Kryeministri Edi Rama nderohet nga Presidenti i Emirateve të Bashkuara Arabe Sheikh Mohamed bin Zayed Al Nahyan.
Rama shpreh mirënjohje duke theksuar se ky vlerësim përfaqëson respektin dhe mirënjohjen më të lartë që i është dhënë ndonjëherë një kryeministri shqiptar nga një vend mik.
“Thellësisht i prekur prej surprizës së paimagjinueshme dhe nderimit të jashtëzakonshëm nga presidenti i Emirateve të Bashkuara, Sheikh Mohamed bin Zayed Al Nahyan akordimi i medaljes më të lartë të vendit mik, e cila mban emrin e themeluesit të Emirateve të Bashkuara, Sheikut Zayed, është respekti dhe vlerësimi më i madh për një kryeministër shqiptar, që e mora përulësisht plot me krenari për Shqipërinë, e me mirënjohje të thellë për mikun e madh të shqiptarëve, lartësinë e tij Sheikh Mohammed bin Zayed, si edhe për çdo shqiptar që ma ka besuar udhëheqjen dhe përfaqësimin e atdheut tonë të përbashkët”, shkruan Rama.
Kryeministri Rama ndodhet qe prej ditës së djeshme në Emiratet e Bashkuara Arabe në kuadër të Javës së Qëndrueshmërisë “Abu DhabiSustainability Week 2026”.
Rama bëri me dije se ky forum ndërkombëtar ka sjellë së bashku kryetarë shtetesh dhe qeverish, liderë të biznesit dhe shoqërisë civile, për të diskutuar sfidat dhe perspektivat e zhvillimit të qëndrueshëm në nivel global.
