Kryeministri Edi Rama së bashku me ministren e Punëve të Brendshme, Albana Koçiu dhe ministrin e Drejtësisë, Besfort Lamallari, kanë prezantuar një sërë masash të reja në sektorin e ndërtimit, të cilat synojnë të forcojnë kontrollin, të rrisin përgjegjësinë dhe të mbrojnë interesin e qytetarëve
Kreu i qeverisë paralajmëroi që çdo punonjës shteti i cili kapet me ndërtime pa leje, nuk do të lejohet të punojë më në shtet për një periudhë prej 7 vitesh.
Më tej, Rama nuk ka lënë anash as “ironitë” me paraardhësin e tij, Sali Berishën për të cilin tha se në kohën kur ishte Kryeministër deklaronte Bathoren si mrekullinë e 8-të të botës, pasi ishte ndërtuar i gjithi pa leje.
“Sporti i ndërtimeve pa leje është zhvilluar se sport kombëtar, është nxitur dhe nga lart, ishte dikush para meje që Bathoren e quante mrekullinë e 8-të të botës sepse e quante i vetmi qytet në botë i ndërtuar i gjithi pa leje. Globi nuk ka 7 mrekulli për 8. Edhe punonjësit e shtetit janë marrë me ndërtime pa leje. Në rast se kjo konstatohet, do të ndalohet të punojë në shtet për 7 vite që nga momenti që do t’i njoftohet masa”, tha ai, teksa më tej paralajmëroi që të gjithë ata që zaptojnë tokën pa leje, pa pasur një titull ligjor do të përballen me masa të rënda ligjore, deri në arrest me burg.
“Të gjithë masat e reja që janë në fuqi sot që flasim. Ndërkohë që hyn për konsultim ndryshimet në kodin penal. Në ndryshimet në kodin penal ku fillon nga zënia e tokës, pra çfardolloj zënie toke publike apo private pa pasur një titull ligjor që do të thotë leje për çdo lloj qëllimi, banimi, do të dënohet me burg. Edhe për parkim e zë tokën dhe bën një parkim të paligjshëm do të shkosh në burg”, tha Rama.
